Денес, преку потпишување на Меморандум за соработка со Народната банка, Агенцијата за катастар на недвижности ја операционализира идната рамка на институционална соработка, со која се воспоставува понапредна размена на податоци и информации од заемен интерес.

Преку оваа соработка, Агенцијата за катастар на недвижности ќе даде поддршка на Народната банка во збогатување на анализите на пазарот на недвижности – како значаен сегмент во нејзините активности за постигнување и одржување на финансиската стабилност.

Потпишувањето на Меморандумот претставува потврда на заемната определба за интензивирање на соработката помеѓу двете институции, заснована на принципите на професионалност, транспарентност и ефикасност – со заедничка цел унапредување на квалитетот на податоците и политиките од јавен интерес.