За Државниот завод за геодетски работи
Државниот завод за геодетски работи е самостоен државен орган задолжен да ги извршува геодетските работи и да ги запишува правата на недвижностите. Основан е на 28.07.1947 година од страна на Владата на Република Македонија. Својата функција ја извршува преку подрачни одделенија лоцирани во 29 поголеми града во Република Македонија и централа сместена во главниот град – Скопје. Во ДЗГР работат вкупно 830 лица на територијата на целата држава.
Согласно Законот за организација и работа на органите на државната управа (“Службен весник на Република Македонија” бр. 58/2000) во надлежност на Државниот завод за геодетски работи се работите на премерот, катастарот, одржувањето на премерот и катастарот и запишувањето на правата на недвижностите.
Оперативните теренски геодетски работи, врз основа на добиени јавни овластувања, ги вршат трговци поединци - овластени (лиценцирани) геодети и трговски друштва за геодетски работи (приватни геодети).
Катастар на недвижности
Катастарот на недвижностите е збир на податоци од премерот, катастарското класирање на земјиштето и на утврдените права на недвижностите. Премерот и катастарот на недвижностите ги опфаќа и промените на недвижностите и на правата на недвижностите што настануваат по извршениот премер, односно по установувањето на катастарот на недвижностите (одржување на премерот и катастарот на недвижностите).
Под недвижности се сметаат: земјиште, згради, посебни делови од згради и други објекти изградени на земјиштето. Катастарот на недвижностите служи за стопански, научни, управни, статистички, даночни и урбанистички потреби, заштита на правата на недвижностите, изготвување на посебни евиденции на недвижностите и за други потреби на државните и други органи, претпријатијата, другите правни лица и на граѓаните.
Со премер на недвижностите се обезбедуваат податоци за хоризонтална и вертикална претстава на земјиштето и други податоци за земјиштето, податоци за зградите, посебните делови од згради и други објекти и за носителите на правата на недвижностите на територијата на Република Македонија.
Премерот опфаќа: основни геодетски работи; поставување мрежи на геодетски точки; утврдување на катастарски единици; снимање на недвижностите и изготвување оригинали на геодетски планови.
По извршениот премер, се врши катастарско класирање на земјиштето, се запишуваат правата на недвижностите и се установува катастар на недвижности.
Во катастарот на недвижностите се запишуваат следните права: правото на сопственост, стварните и личните службености, товарите и ограничувањата и други права за кои запишувањето е определено со закон. Запишувањето на правата на недвижностите во катастарот на недвижностите е задолжително и се врши по службена должност или по барање на странката. За запишување на правата на недвижностите во катастарот на недвижностите по барање на странка се плаќаат надоместоци, а запишувањето по службена должност е ослободено од плаќање на надоместоци. Висината на надоместоците се утврдува со тарифник кој го донесува Владата на Република Македонија.
Установувањето на катастарот на недвижности опфаќа: излагање на јавен увид на податоците за недвижностите со утврдување на правата на недвижностите и изготвување на катастар на недвижностите.
Катастарот на недвижностите се изготвува врз основа на податоците прибавени со премерот и катастарското класирање на земјиштето и утврдените права на недвижностите, за секоја катастарска општина.